#cb_psychologie

علاش خاصني نتعلم علم النفس و يكون جزء من اهتماماتي اليومية ؟

7 ديال الاسباب الى عرفتيهم ممكن تغيير حياتك و تخلي تعلم علم النفس من اولوياتك
كيف ما هو معروف عند الجميع كلشي كينجاذب لاي حاجة عندها علاقة بالنفس و فهم اسرارها و فك طلاسيمها ... لا لا مكنهدرش على مدربي التنمية الذاتية و PNL کنهدر على علم النفس كعلم قائم بذاته و معنده حتى علاقة بالفلسفة الله يزازيكم بخيير نفرقوا شوية مابين الاختصاصات المهم مانطولش عليكم انا حاولت نقل ليكم باختصار اهم ما يمكن ليك تستافد من علم النفس كانسان كيسعى يطور ذاته فاخر المقال غادي تلقاو المراجع لي اعتمدت عليها
اول حاجة كيعلمها ليك علم النفس و هي :

1- التبصر و زيادة فهم الذات
و هذه من الاشياء البديهية فعلم النفس بحيث كيمكنا باش نفهمو نفوسنا و دوافعنا و انماط سلوكنا المختلفة و هادشي عن طريق معرفة البناء السيكولوجي او النفسي ديالنا مثل نعرفو ابعاد الشخصية ديالنا
فالتقييمات السيكولوجية كتمكنا من التعرف و فهم انفسنا بشكل افضل و صحيح

2-فهم طبيعة الانسان
علم النفس التطوري كيساعدنا باش نفهمو كثر الدوافع الطبيعية و القوى الداخلية ديالنا بحال العدوان ،الحياة الجنسية، و هيمنة "آليات البقاء على قيد الحياة" و لي خاصنا نتعلمو نتحكمو و نسيطرو عليهم باش نكونو اكثر تحضر

3-التغلب على الاحكام المسبقة و الانحيازات (overcoming biases)
فعلم النفس كنلقاو تخصص علم النفس الاجتماعي و لي كيهتم بدراسة الاحكام المسبقة و الانحيازات
بحال مثلا الانحياز داخل او خارج مجموعة معينة و لي كيتعتبر شكل من اشكال التعصب و التمييز
the fundamental Attribution Error
معرفتش كيفاش نترجمها بالعربية و فضلت نخليها بالانجليزية حيت بعض المرات الترجمة كتكون غالطة المهم هاد العزو كيوضح لينا علاش فبزاف ديال المرات كنلومو الاخر و كنحملوه المسؤولية فحين كنعطية اهتمام اقل بكثير للعوامل الظرفية لي خلات هاداك الشخص يتصرف بطريقة معينة
فالفهم الواضح للاحكام المسبقةو الانحيازات فالادراك الاجتماعي يمكن يعاونا باش نوليو اكث تعاطفا و تفهما للاخرين و لانفسنا

4-فهم الدوافع و تحديد الاهداف(motivation and goal-setting)
من خلال فهم الحوايج لي كتموتيفينا و باستخدام تقنية تحديد الاهداف يمكن لينا نتعلمو انجاز الحوايج العظيمة و يمكن لينا نفهمو بشكل افضل علاش كنسعاو بكل مافينا من جهد باش نوصلو لافضل النتائج

5-تحسين التواصل و التعاطف
انك تعلم مواضيع بحال الذكاء العاطفي(emotional intelligence) و التواصل الغير اللفظي(nonverbal) يمكن ليهم يساعدونا باش نركزو انتباهنا على الاشارات الدقيقة و الغير المذكورة من طرف الاخرين و لي كتسمح لينا باش نتواصلو معاهم على مستوى عاطفي عميق

6-باش تكوني ام او اب جيد

ماكاينش شك انك الى تعلمتي شي حوايج فعلم النفس التطوري غادي يعاونك بزاف باش تعرف كيفاش تختار الشريك المناسب فحياتك و الاكثر و الاهم كيفاش تكون اب و ام جيدين و بالتالي كيمكنك باش تربي طفلك بشكل صحي على المستوى السيكولوجي

7-كيعلمك كيفاش تطور من نفسك و تكون شخص افضل
علم النفس الاجابي(positive psyhollgy) هو لي اهتم بهاد الجانب بزاف فمن الموضوعات لي كيركز عليها كنلقاو : السعادة ،الغفران،الامتنان،فهم شنو هو الصفح الصحيح، بناء الطابع الشخصي (personal character) و کيفاش نكونو اكثر انسجام مع ذاتنا و اكثر ارتياح
فباختصار علم النفس ليس مجرد علم بل هو اسلوب حياة اينما وجد الانسان و جد علم النفس .
و اخيرا بغيت نختم بقولة من اجمل ما قيل في ارتقاء الذات للعبقري برناندشو : " هذه هي المتعة الحقيقية في الحياة ان تكون مشغولا بهدف تعرف انه ذو قيمة كبيرة بدل من ان تكون كتلة انانية صغيرة من الاوجاع و المظالم شاكيا، ان العالم لن يكرس نفسه من اجل سعادتك"
و هادشي كامل الى قلناه باش تستهلك بلا ما تهلك 😁😀☺
بس: المرجع لي اعتمدت عليه :