- بغيت نهضر على الفيس بوك، ولكن ماشي من الناحية العلمية ولا ما قاله الاطباء و العلماء على الفيسبوك .. الخ وإنما عن تجربة و بزاف دالحاجات شفتهم . مقالي بسيط جدا

- الفيس بوك Facebook اللي من بين أكبر المواقع التواصل الآجتماعي الأكثر إستعمالا فالعالم .. ولات عندو مكانة مهمة و بزااف عندنا كاملين. لكن الأغلب كايشوفو إدمان و مضيعة للوقت (عند واليدينا والناس الكبار) بالرغم من أنه فيه فوائد كثيرة أولها هاد المجموعة هههه (Creative Brains) و أيضا كاتتواصل مع الناس كاتكتاسب خبرات تقدر تسول على شي حاجة تلقاها هنا و ماتلقاهاش ف غوغل . يعني بزاف مايتقال فيه .
- لكن اللي بغيت نركز عليه و هو الفيسبوك عند الشباب و المراهقين و حتى الاطفال الصغار . بحيث كاتلقى أغلبية كايفرغ الطاقة السلبية و الإيجابية هنا و الاولى أكثر من الثانية . و هادشي حيت مالقاش اللي يحس بيه و خصوصاا الناس اللي ساكنين معاه( واليديه الإخوة ديالو .. عائلتو) و كاتلقاه دائما فواحد الصراع معاهم بحيث واحد الهضرة ديما كايسمعها وهي ( راه خرجتي على راسك بداك التخربيق، الفيسبوك هو اللي خرج عليك .. فيسبوك تدمنتي عليه أشنو كاتستافد منو ... الخ) و لكن هاد الناس الكبار معارفينش اشنو و لا آش كايستافد داك الطفل ولا الشاب من هاد الموقع.

- كان غايكون من الأحسن أنه باش تعرف هاد الطفل ولا الشاب آش كايدير فالفيسبوك تحاور معاه بالخاطر و بالهداوة باش أول شيء تكتاسب ثقة و الحب ديال هاد المدمن
(اللي فنظرك مدمن) علاش قلت تكتاسب الحب و الثقة باش يفتح ليك قلبوا و يعاود ليك او لا حتى اذا ماعاودش ليك غاتنوض دير خطوة بسيطة فتح كونط فالفيسبوك و حاول ما أمكن أنك تدخل عندو و تشوفو آش كايبوسطي كيفاش كايعبر كيفاش كايهضر مع صحابوا .. كيفاش النظرة ديالتو على الحياة اللي هو عايشها بينو و بين نفسوا .. حاول تراقب داك "المدمن" من بعيد . و كسب الثقة ديالتو من خلال هاد الموقع تفاعل معاه فالمنشورات ديالوا و خصوصا اللي كاتكون كادوي على حالتو النفسية اللي غالبا غاتكون محطمة ( كانهضر على هاد النوع دالناس اللي كايفرغ طاقتو السلبية فالفيسبوك) و كايتظاهر أمام الناس و عائلتو أنه راضي على الوضع و بيخير مع نفسوا، أحيانا الشيء اللي كايخللي هاد الطفل بعيد عن العائلة ديالو و كايشوفهم مرة و لا زوج مرات فالنهار و هو داك الحوار مكاينش و ماكرهش هاد الإبن و لا الإبنة واحد الحصة ( كليسة فالنهار فشي قهوة و لا فشي طبيعة) بعييييدا عن خبث الشوارع و الضجيج و تسولو على حالتو النفسية آشنو بيه و كيفاش داز عندو هاد الأسبوع . لانه هاكة غانخلليو هاد المدمنين قراب لينا و مانبعدوهومش لانه تصرفات بعض الناس الكبار هي اللي كاتخللي الصغير يهرب من بين يديهم و ماشي يهرب جسديا يعني يمشي يخلليهم لا كايهرب منهم فقط روحيا الروح ديالو عقلوا مكاينش مع الناس اللي دايرين بيه . الفيس بوك "Facebook" هو من الوسائط اللي كاتخللي الشخص أنه يتصرف براااحتوا و خصوصا إذا كان مبلوكي عائلتو منو . و علاش تخللي داك ولدك ولا بنتك يبلوكيك ؟ بالعكس تعامل و كأنه صديق فقط على الفيسبوك و تصرف و تفاعل معاه عادي و حاول تشوف منشوراتو من ناحية أخرى يعني تحس بداكشي اللي كايكتب و شنو المقصود منو . حيت ماالي يبلوكسك ولدك و لا بنتك و لا ختك و لا خوك عرف بأنه خايف منك . خاف منك فالواقع هرب منك و مشا للعالم الإفتراضي يفرغ داكشي اللي ماقدش يديرو و لا يقولو قدامك

● سمحوا ليا طولت ❤
By : Amal Malki