منين توصل لثَّلاثين من عمرك، كاينة واحد الفئة ديال الناس نتا اللي غادي تختارهم.
ناس منين تمرض يزوروك فالصبيطار، ولا وقفتي على الدم غا يكونوا أول المتبرعين، غادي يوصلوا معاك للمحطة لا كنتي مسافر و هوما نفسهم اللّي غا تلقاهم كا يتسناوك منين ترجع. نهار توصل لحالة اكتئاب و تربط حَبل المشنقة على عنقك هوما اللي غادي يحلوه و يساندوك، ناس كا تشوف المكالمة جاية من عندهم كا تفرح و تخلي لي فيدك و تجاوبهم.
فأي موقف صعيب كا يطيحوا هوما اللُّولين فبالك، و لا وقفات بيك الطوموبيل ما كا تتاصلش بالديباناج و كا تتصال بيهم حيت عارفهم يجيو ليك واخا تكون فالحدود مع موريطانيا. ناس ما كا تذبح الأضحية ديال العيد تا يشوفوك واش عيدتي و ذبحتي، و ناس ما تحلا ليهم لفراجة فماتش ولا سينما غير و نتا حداهم.
و هوما نفسهم اللي كا يغَسّلوك و يدفنوك و كا تكون آخر علاقة ليك بيهم فالدنيا هي كمشة التراب الأخرة اللي كا يرميوا على قبرك و قرعة ما زهر اللي كا يرشوها فوق الشاهد ديالك.
فهاد المرحلة خاص ترد البال مزيان حيت هاد الناس عُملة نادِرة و صعيب باش تلقاهم.