الموجات الميكانيكية المتوالية الدورية.
متى تهتزان نقطتان من وسط انتشار الموجة على توافق في الطور وةعلى تعاكس في الطور؟
ماهي ظاهرة الحيود؟
متى نقول ان الوسط مبدد للموجات؟
اولا باش نقولوا ان نقطتين تهتزان على توافق في الطور خاص يكونوا كيهتزوا في نفس الوقت وفي نفس الاتجاه بحل في الصورة1 ايلا لاحظتوا ان النقطة A و النقطة B والنقطة C راه كيطلعو في نفس الوقت ويهبطو في نفس الوقت كنقولوا بلي راهم على توافق في الطور ونفس الشيء بالنسبة لنقطةD والنقطةE كيهبطو ويطلعو في نفس الوقت حتا هوما راه على توافق في الطور ويلا لحظتوا ان المسافة الفاصلة بين AوB هي طول الموجة λ وحتى المسافة بين BوC هي λ اما المسافة بين A وC فهيλ.2 والمسافة بين D وE هي λ واذا استمرينا في تحديد النقط لكتهتز على توافق في الطور غادين نلقاوها هي λ و λ.2 و λ.3 و λ.4 ...الى اخره اذن النقط التي تهتز على توافق في الطور هي النقط التي تفصل بينها المسافة λ.K مع K=1,2,3,4,5,....N حيث K هو عدد صحيح.
اما الا رجعنا لنقطة A و النقطة D كيبانو لينا كيهتزوا على تعاكس في الطور يعني ملي تكون وحدة هابطة لوخرا كتكون طالع والعكس صحيح وبين النقطتين A و E نفس الشيء على تعاكس في الطور وبين D وC نفس الشيء وكذلك بين B و E وهنا كنشوف المسافة الفاصلة بين بين A و D هي λ/2 وبين A وE هي λ.3/2 وبين D وC هي λ.3/2 ويلا بقينا غادين كنشوفوا نقط ليكتهتز على تعاكس في الطور غادين نلقاو λ.5/2 و λ.7/2 و λ.9/2 ...الى اخره اذن بصفة عامة النقط التي تهتز على تعاكس في الطور هي λ.K+ λ/2 اذن هي نفس العلاقة ديال توافق في الطور كتزيد عليها فقط نصف طول الموجة λ/2 وهنا الى عملنا ب λ/2 غادي تصبح لعلاقة هي (2K +1).(λ/2).
وبصغة اخرى الى بغينا نعرفوا طول الموجة دابا هو اصغر مسافة تفصل بين نقطتين تهتزان على توافق في الطور مثل A وB او Bو C او D و E.
واحد ملاحظة راه ماشي غير نقط القمة ولا نقط لقاع هما ليكنطابق عليهم هاد قواعد راه حتى i و j كيهتزوا على توافق في الطور المهم اي نقط في الشكل كتفصل بيناتهم λ.K راه على توافق في الطور ولا كانت تفصل بيناتهم (2K +1).(λ/2) راه على تعاكس في الطور وباش منبقاوش محصرورين في نقط الى شفتو الصورة 2 راه عندنا موجتين كيهتزو على توافق في الطور في الشكل أ وهدا كيخليهم يتجمعو ويعطونا موجة كبيرة وفي الشكل ب لموجتان كيهتزو على تعاكس في الطور وهادشي كخليهم يهملوا بعضياتهم ومكتبقى تشي موجة وهاد ظاهر كتوقع ليان في تداخل موجات الضوء الاولى كتسمى تداخل بناء حيث كيعطي موجة كبيرة والثاني كيعطي تداخل هدام حيث كتنعادم لموجة هادا مسمار طرقناه. 
دابا غادين ندوزا لظاهر الحيود: لحيود هو فاش واحد لموجة كنديرو ليها واحد لعائق في الطريق ديالها ليكيخليها تغير شكل الانتشار ديالها بحال حيود موجات على سطح الماء الصورة 4 و5 وباش يوقع لينا لحيود خاص داك لعائق ليغادين نديروه لموجة يكون كيحقق شروط بحال تما في الشكل لعائق هو درنا واحد لحاجز امام لموجة فيه واحد شق a صغيير وباش يوقع لينا لحيود خاص داك شق يكون صغر او يساوي طول الموجة يعني a<λ او a= λ وكيما كتشوفو بلي في صورة 3 عرض الشق a لا يحقق الشرط والموجة انتشرت عادية ولم يقع اي حيود.
ولي خاصكم تعرفوه وتعقلو عليه مزيااااان هو ان هاد ظاهرة الحيود كتغير لينا فقط شكل ديال لموجة ولكن مكتغيرش لخصائص ديالها بحال السرعة، التردد وطول الموجة. الموجة الواردة والموجة ليوقع ليها لحيود عندهم نفس السرعة، التردد وطول الموجة!! ☡عقل مزيان على هادوا.
دبا ندوزوا اخر سؤال وهو ظاهرة التبدد: امتا كيوقع لينا التبدد🤔 الى كانت سرعة🏃 ديال انتشار لموجة🌊 كتعلق بالتردد ديالها يعني لكنا في واحد الوسط وكنا كنحدتوا موجات بترددات مختلفة وكينتاشروا بسرعات مختلفة هنا كنقولوا بلي لوسط مبدد للموجات اما الا كانت سرعة مكتأترش لينا بالتردد فالوسط غير مبدد هنا غادين نعطيوا 2 امثلة.
اولا الصوت🕪 كنعرفوا بلي صوت كينتاشر في الهواء بسرعة ثابتة تقريبا 343 متر في الثانية وكيفما كان تردد سرعة مكتبدلش هنا كنقولوا بلي الهواء وسط غير مبدد للموجات #الصوتية🕪 متنساش راه هنا قلنا فقط لموجات الصوتية عندك تلف كلشي☡.
المثال الثاني وهو فاش كتكون عندنا لموجات لكتنتاشر في البركة المائية🏊 هنا سرعة الموجات كتعلق لينا بالتردد ديال الموجات يعني الى بدلنا التردد حتى سرعة الانتشار كتبدل وهنا كنقولو بلي لوسط المائي مبدد للموجات المائية وراه ضروري غادين ديرو شي تمرين في لقسم ليكبين ليكم هاد الظاهرة وراه كين واحد تمرين في المقرر الدراسي كيوضح هاد الظاهرة.
الا كان تفاعل وبغيتوه نصحوا ونلوح ليكم لحل✌☺ 
الدرس الثاني سالا لقائنا مع الدرس الثالث "انتشار موجة ضوئية" متنسوش دعمو لاباج ديالنا باش نستمروا طاكيوا صحابكم يجيو ستافدو وديروا برطاج باش لمنشور يوصل لصحابكم.
الا كان تفاعل غادي نستمر في شرح دروس لباك بالدارجة ولبساطة✌✌✌
By:
Choaib EL Moustaine
متنساوش دخلوا لمجموعة لتابعة لصفحة راه كنحطوا فيها دروس وفيها كتكون لمناقشة وحتى الاجزاء الاخرين راه كينين فيها👇👇👇