#CB_Marketing
Market Research
دراسة السوق !
مقاولون، مهندسون، تجار، مخترعين...قبل ما يبداو المغامرة ديال إنتاج و إطلاق منتوج جديد ف السوق, ضروري ما يخصهم يفهمو السلوكيات و الخصائص النفسية، السوسيومهنية، الاقتصادية و الثقافية إلخ...ديال المستهلكين المحتملين للمنتوج ديالهم !
كيفاش كيوصلو لهاد النتائج؟ بفضل دراسة السوق (المستهلكين، المنافسين، العوامل و البيئة الاقتصادية و السياسية...)
التعريف ديالها إذن اختصارا كل وسائل البحث اللي كتسمح لأصحاب الأفكار المبدعة و المخترعين و المهندسين يجمعو معلومات/معطيات كمية و كيفية دقيقة بزاف و الهدف كيكون هو :
1- كيفما قلنا قبل، أننا نعرفو المستهلكين و الزبائن المحتملين للمنتوج ديالنا .
2- أنا نقدرو نقارنو راسنا مع المنافسين و نفهمو القطاع ديال النشاط ديالنا باش نقدرو نختلفو عليهم (من ناحية الجودة، الخصائص التقنية، الثمن...) . هادشي كيعاونا نحددو التموقع (le postionnement ) ديال المنتوج ديالنا فالسوق و فالأذهان ديال المستهلكين...
3- نفذو استراتيجية التسويق ديالنا ( mix Marketing ) و نطابقوها تماما (مايمكنش و لكن هادشي في عالم مثالي، نظري) مع خصائص المستهلكين المحتملين : المنتوج، الثمن ديالو، التواصل و الإشهار و التوزيع (في حالة ما إذا كان المنتوج ديالنا عبارة عن خدمات كنزيدو حتى خطة للأشخاص و المراحل و مكان البيع ) ..هاد الخصائص يقدر يكونو السن (النفسي و الفزيولوجي)، المهنة، الهوايات، الدخل...
4- نعرفو رأي الزبون ديالنا على الجودة، السمعة و الجاذبية ديال المنتوج ==》نشركو الزبون فتطوير المنتوج و نجعلو منو أيضا زبون وفي ديالنا !
...مزال الخير بلحاق هادشي طول، ندوزو لحاجة أخرى بالزربة !
كاين بزاف ديال الطرق و الوسائل باش نجمعو هاد المعلومات و منهم :
1-الزبون الخفي (client mystère )..و هم أشخاص كيديرو راسم زبناء غيشريو المنتوجات ديال المنافسين...
2- و كاين shop along: كنتفاهمو مع زبون باش نرافقوه و نمشيو معاه ماللي غايكون غيشري من المتاجر ، كنلاحظو السلوك ديالو و الطريقة ديال الاختيار ديال المنتوجات، كنقرو نسولوه علاش خترتيه و علاش عجبك بالضبط هاد المنتوج...
3- ثالثا I-tracking (internet Tracking) يعني نتفاهمو مع الزبون ، عن طريق بعض البرامج و التكنولوجيات باش نلاحظو كيفاش كيستعملو الانترنت مثلا ، المواقع اللي كيزوروها، شحال كيبقاو فداك المواقع...
آه نسيت ! راه هاد الناس كيتخلصو مزيان مرا ميعاونونا فهاد الدراسات !
4- رابعا (الخيال العلمي) كاين Eye tracking و هادو نظارات غالية بزاف ( شي عشرين مليون) كيخاليونا نحللو حركة العيون ديال الزبناء أثناء التسوق ديالوم. مكاتب الدراسات كيبنيو واحد مرجان ديال بلعاني و كيخالي الزبناء يشريو ما بغاو باش يعرفو شنو هما الألوان ، الباكاجينغ (Packaging ), الشكل اللي كيجذبو الانتباه ديال الزبناء...
مزال طرق و وسائل بزاف و خيالية (النوروماركوتينغ neuromarketing مثلا) و Big Data...باش تجمع المعلومات اللي تعاونك تبيع المنتوج مازال ملحوظة أخيرة : الناس و الزبناء اللي كيشاركو فهاد الدراسات ما كيتختاروش عشوائيا و لكن وفق شروط محددة ...
هادشي كامل في إطار Marketing ماشي هو الإشهار.
Amicalement votre !