#cb_psychologie
#التفاؤل_المقارن
-عمر كيكمي بزااف و لكن فين ما كينصحو صاحبه كريم باش يحبس الكارو حيت ممكن يتسبب ليه فالسرطان عمر كيظحك و يقول : امتخافش اصاحبي عمري عمر الكلب و انا باقي صغير
-احمد شيفور ديال الكار هادي 15 عام مني كينصحو شي حد باش ينقص السرعة كيقول : خوك حرايفي و قديم فالسوكان واش عاد غادي نصوك اول مرة ؟

شنو كتلاحظو فالحالتين بجوج؟
الثقة فالنفس ياك؟ و انهم مستحيل توقع ليهم شي حاجة خايبة ..
هادشي اسيادنا فعلم النفس المعرفي كيتعتبر احد الانحيازات المعرفية لي سميته : انحياز التفاؤل المقارن
بلاتي بلاتي اسارة متزربيش علينا بهاد المسطلحات العلمية
شرحي بعدا شنو هي الانحيازات المعرفية؟
واخا الانحازات المعرفية : هي انحراف فاتخاد الاحكام كيأدي لتشوه فالادراك الحسي او اعطاء تفسير غير واقعي .
بلاتي شنو هو الادراك الحسي؟
واخا الادراك هو مجموعة من العمليات و الاليات العقلية لي من خلالها شخص كيتعرف على العالم الخارجي و البيئة لي دايرة بيه عن طريق المعلومات لي كتوفرها ليه الحواس دياله.
نرجعوا دابا لموضوعنا و لي كيهمنا هو :
احد هاد الانحيازات المعرفية لي سميتها : التفاؤل المقارن
فشنو كنقصدوا بالتفاؤل المقارن؟
هو نفس الامثلة لي عطينا فالاول بمعنى هو اعتقاد الناس ان احتملالية وقوع احداث ايجابية ليهم اكثر امكانية بالمقارنة مع غيرهم و العكس صحيح اي احتمالية وقوع احداث سلبية ممكن توقع للناس اكثر منهم
كاين 4 ديال العوامل مشتركة لي كتخلي الفرد منحاز للتفاؤل وهي :حالته النهائية المرغوب فيها، وآليات ديالو المعرفية، والمعلومات اللي عنده على راسه فمقابل الآخرين، والمزاج العام.
و كيف ما سبق عطيت امثلة فالانحياز التفاؤلي كيبان فعدد من المواقف نزيد نعطي امثلة اخر: الأشخاص للي كيعتاقدو أنهم أقل عرضة لخطر الوقوع ضحايا لجرائم أو التجار للي كيعتقدوا أنهم أقل عرضة للخسارة او العامل لي كيشوف راسه اقل عرضة لمخاطر حوادث الشغل....
شنو التأثير ديال هاد الانحياز للتفاؤل المقارن على السلوك الشخص؟
صراحة الباحثين فمجال علم النفس حطوا مجموعة من المقاييس لي من خلالها كيمكن لهم يحددو درجة التفاىل المقارن للاشخاض فمواقف متعددة و التاثير ديالها على السلوك الوقائي للشخص
بمعنى قد ما كان الشخص كيميل لتفائل مقارن مرتفع اي للاعتقاد انه مستحيل يطيح فحادث سلبي حيت ثايق فراسه و فالمعلومات لي عنده على الموقف و الخبرة دياله قد ما كان سلوكه الوقائي ضعييف يعني ماغاديش ياخده الاحتياطات اللازمة باش يتفادى خطر الوقوع مثلا: فحادث سير او الاصابة بسرطان الرئة او التعرض لحادث عمل خطير الخ الخ
شخصيا كنت خدمت فالبحث ديالي فالاجازة على هاد المتغيرين لي هما : التفاؤل المقارن و السلوك الوقائي عند العاملين فالمجال الصحي و بالضبط فقسم الفحص بالاشعة
و كانت نتائج مهمة بحيث انني وجدت ان العامل لي كيكون اكثر اقدمية هو لي كيكون عنده تفاؤل مقارن مرتفع و بالتالي مكيظنش انه ممكن يتعرض لحواث الاشعة و بالتالي مكيخدش السلوكات الوقائية .
الموضوع طويل ومبغيتش نخربقكم حاولت فقط نقربكم من هاد المفهوم و تعرفوا هاد المرة علاش كيتصرفوا بعض الناس فشي مواقف بحال هاكدا 🤗
الى اللقاء الى مفهوم سيكولوجي اخر 😀