السلاموعليكم :D مساء الأنواار والكرياتيفيتي

غانعاود ليكوم ليوما علا أصل هاد الاسم لي دايرا ف الكونط فايسبوك ديالي: ابق إنسانا

نبداو علا بركة الله :)
ابق إنسانا أو Restiamo Umani ب لغة أصلها الإيطالية.
ابق إنسانا هي العبارة الشهيرة وعنوان كتاب نشرو فيتوريو أريغوني Vittorio Arrigoni..
شكوناهوا هاد فيتوريو؟
فيتوريو كان مراسل صحفي وكاتب وناشط، تزاد ف إيطاليا ف فبراير 1975، بيييخير واكل شارب مأمّن مستمتع بالحيااة السعيدة.. ف 2002 زار القدس عادي ك سائح، من بعد ما دار جولات كثيرة ف أنحاء العالم.. ديك الزيارة قلبات ليه حياتو كلياً.
دخل فيتوريو معا حركة التضامن العالمية ISM لي كاتأيد الفلسطينيين وكاتنشط فوق الأراضي الفلسطينية.. ف 2008 شارك معاهوم فيتوريو ف حملة كسر حصار قطاع غزة.
فيتوريو لي كان عايش مخيّر ف بلادو مشا باش اعيش كـ درع بشري للناس ديال غزة، بحكم أنو أجنبي عندو حصانة، وبالتالي اسرائيل ماتقدرش تقتلو كيما كاتقتل بدم بااارد وقدام گاع كاميرات العالم، الفلسطيني.
ف احدى المرات لي كان فيتوريو كايوقف فيها كدرع بشري باش احمي أحد الصيادين ف السواحل ديال غزة، غادي تعتاقلو اسرائيل بهاااد التهمة نيت وغايتم الترحيل ديالو ل ايطاليا.
فيتوريو غايعاااود يرجع ل غزة.. بالضبط ف الفترة فاش كان الجيش الاسرائيلي منوّضها ف غزة.. حرب غزة..
كان فيتوريو بالإضافة لأنو كايخدم جسمو المحصن دوليا باش يحمي أجسام الفلسطينيين لي مسموح فيها كولشي،، كان فيتوريو أيضا كايقوم بتغطية للحرب لي كاينا تما.. كان كايكتب ف مدونة ديالو لي سميتها حرب العصابات Guerrilla Radio وكان أيضا مراسل ل إحدى الإذاعات وأيضا لإحدى الجرائد ف إيطاليا.
من بعد فيتوريو غادي ينشر كتاب غايسميه Restiamo Umani لي كيمّا گلنا كايعني ابق إنسانا.. هاد الكتاب جمع فيه بزاف د التحقيقات الصحفية لي كاتوثق الحرب علا غزة لي عاشها وعايشها. كتابو هادا غايترجم ل عدة لغات الانجليزية الفرنسية الاسبانية والألمانية.. والجميل فيه أيضا أن التقديم ديالو دارو المؤرخ الإسرائيلي إيلان بابي (هاد المؤرخ تاهوا كايأيد حق الفلسطينيين ف مقاومة الاحتلال وعودتهم لأرضهوم ومن الأشخاص لي تعرضو للانتقااد طبعا من طرف إسرائيل...) موهيم هادا تاني قصتو بووحدها..نرجعو ل فيتوريو ولكن هنا ستختلف الروايات..
كايقولو ف 14 أبريل 2011 تم الاختطاف ديال فيتوريو من طرف اشخاص كاينتاميو للسلفية، وطلقو شي فيديو ف يوتيوب كايقولو ل حماس باش تطلق ليهوم شي معتقلين سلفيين مشدودين عند حماس، ف مقابل ارجعو فيتوريو.. عطاوهوم 30ساعة قبل مايقتلوه.. ولكن كايقولو أنهم قبل گاع ماتسالي ديك المهلة لقاو الجثة ديال فيتوريو ف واحد الدار قديمة.. ومن بعد تتأكد طبيا أنو مات مشنوق... هادي رواية 1
الرواية 2 كاتقول حماس قتلاتو.. هاكاك نيييشان
الرواية 3 كاتقول قتلو شي حد مجهول واحتمال كبيييير يكون الموساد الإسرائيلي لي دار هادشي كامل وصفّاها ليه

الموهيم أول مرة نتعرف علا فيتوريو أريغوني شفتو ف فيلم وثائقي دارتو الجزيرة وكان فيتوريو مازااال عايش، صورو معاه حياتو اليومية وكيفاش كايتصدّا للجيش والشرطة الإسرائيلية وكيفاش ولا كايدوي العامية الفلسطينية وعايش وسط غزة بحاال أي غزاوي... وكان داير وشم ف دراعو مكتوب فيه: المقاومة.
فيلم أثر فيا بواحد الشكل بزاااااف.. كيفاش شخص يتخلا علا كولشي سبل الحياة المريحة ويمشي يعيش وسط بقعة متعرضة ف كل لحظة لهجوم همجي من طرف إسرائيل.. وماشي مجرد يعيش تما صافي، بل أنو يسترخص حياتو مقابل حياة ناس أوخرين مقهورين.. وأنو ايكون سباب ف أن الحرب علا غزة تكون ف خبار العالم كامل..
شحال ديال الإنسانية لي خاصّانا باش نوهبو حياتنا كااملة من أجل حماية حياة ناس أوخرين لي كاينين فواحد قرطاحنة بعييييدة علينا ماكايجيونا ماكانجيوهوم...

هادا رابط الفيلم الوثائقي لي كنت شفت بعنوان ابق إنسانا:
النسخة العربية
https://www.youtube.com/shared?ci=3MEhTDevINM
النسخة الإنجليزية (بجودة أعلى)
https://www.youtube.com/shared?ci=3GDQlao5UfU

ب.س: ف نفس العام كان غايجيني كادو من إيطاليا وطلبت أنو يكون كتاب Restiamo Umani ب لغتو الأصلية وبنفس تعابير وأحاسيس فيتوريو أريغوني 💛
😁 من فرحتي العاااامرة باقيا محتافظة ب البلاستيكة فاش جاني ( 6 سنين دابا 😂) .. و واخا ماكانقراش الايطالية مزيان ولكن ف كل مرة كانهز نقرا منو ونحاول فقط نحس ب الإنسانية د فيتوريو وديال المؤرخ إيلان بابي ✌وطبعا فكرت نتعلم الإيطالية باش حتا نفهمو 😉

هااادي هيا قصة ابق إنسانا ❤
وشكرااا ليكوم بزاف.. كان ليا شرف نعاود علا قضية كبيرة بحال هادي بأسلوبي الخاص وبگاع الأحاسيس لي تعاود تحركات فيا وانا كانعاود ليكوم دابا ❤

@ع.أنافلاو