مؤخرا في إحدى المختبرات الكندية و لي قبل منها كان فالمختبر ديال العالم هاروشSerge Harouche ،نجحو انهم يصيفطو معلومات عن طريق ما يسمى بالتنقل الكمومي Quantum Teleportation، فشنو هوا هاد التنقل الكمومي و واش يقد يصدق باش نقلو بيه بنادم من بلاصة لبلاصة فرمشة عين؟
التنقل الكمومي او Quantum Teleportation هوا واحد العملية جات كنتيجة مباشرة لما يسمى في فزياء الكم بقانون التشابك الكمي Quantum Entanglement ، قانون التشابك الكمي هو القانون لي خلا تلاتة من اروع الفزيائيين يتجمعو و يكتبو مقال فPhysical Review ،باش يبينو عن طرقو ان ميكانيكا الكم هي فقط نتيجة لعدم فهمنا الكامل للفزياء، هاد المقال تحط باسم EPR Paradox ،لي كتبو انينستاين Einstein؛ بودولسكيPodolski،و روزنRosen، .ساعا واخا نوضو هاد الروينة ميكانيكا الكم انتصرات عليهوم و غادي يجي موراهوم بيلBELL هوا لي غادي يضحض المقال ديالهوم، بالرغم من ان هاد العالم منسي و مامعروفش بزاف.
ندخلو دبا للتشابك الكمي تخيل معايا انه عندك جوج الالكترونات A,B فنظام واحد ، إذن يمكلك توصف الحالة ديالهوم عن طريق الدالة الموجية*Wave Function،لي فيها جميع المعلومات على النظام ديالك،:الطاقة، الموضع النسبي..هي بطاقة التعريف ديال الجسيمين،من بعض مجمعتي هاد الجسمين ،دبا غادي نفرقوهوم واحد غادي نحطوه فالتالي ديال الكون و لاخور غادي نخليوه فالارض، اجي دابا نديرو تجربة على الجسيم لي فالارض A، نحسبو مثلا الطاقة ديالو، فالى درنا هاد العملية فالجسيم لي فالتالي دالكون B غادي يحس بهاد العملية و غادي يثأتر تا هوا بهاد العملية، يعني بحال يلى خلقتي واحد الحالة كمومية باش هاد جوج الكترونات ميتفارقوش، وعلاش هادشي قرص اينشتاين،حيت هادشي لي جات ميكانيكا الكم جا منافي للنسبية، لي كتقول بان مكاينش شي حاجة كتمشي بكتر من سرعة الضوء، يعني واخا الجسم لاخور يتأتر ،خاص المعلومة لي تمشي من الجسم A للجسم B مخاصهاش تفوت سرعة الضوء c،مي ميكانيكا الكم كتقولنا بان المعلومة لي نتشارات كتمشي بسرعة مالانهاية اي ديكشي لحظي ،بمجرد تدير القياس على الجسم A الجسم B كيحس بيك.
فاش غادي يفيدنا هاد مبدأ التشابك الكمي ، التشابك الكمي عندو بزاف التطبيقات بحال التشفير الكمي Quantum Cryptography،لي الصين كانت صيفطات اول مركبة فضائية كتسيفط البيانات ديالها للارض عن طريق التشفير الكمي، مابين خصائص هاد التشفير هو انه من المستحيل يعرفك شي واحد شنو سيفتي يعني يلى مشا طبق فالانترنيت مغاديش تبقا شي حاجة سميتها الهاكر.
التطبيق التاني ديالو هو الانتقال الكمومي ، مثلا ان عندي الكترون بغيت هادوك المعلومات لي فيه (يعني الدالة الموجيةديالو)نسيفطهوم ليك مي بلا مانسيفط الالكترون ، ونتا غادي تشد ديك الدالة و غتعطيها للالكترون لي عندك فالمختبر، يعني سيفطليك البطاقة الشخصية ديال الالكترون لي عندي ،و نتا غادي تشد ديك البطاقة وغادي تخلق الكترون جديد توأم لهاداك لي ان عندي، لحد الان قدينا نطبقو هاد المبدأ على فوتونات ، ويلا جا نهار و قدينا نطبقو هاد المبدأ على بلايين الجسيمات ف بإمكانا نسيفطو بنادم من قنت لقنت عن طريق هاد التقنية، فماعلينا غي نحددو الحالة الكمومية ديال الانسان و نسيفطوها لشي بلاصا وحدا خري، و نعاودو نشدو ديك الحالة و نعطيوها للذرات و غادي تكون انسان جديد ، مي المشكيل ان هادشي مستحيل يوقع ،حيت بنادم فيه بلايين بلايين بلايين الذرات والجيسمات ،وكنعرفو بان الجسيمات هي موجات يعني يمكلها تفاعل غي مع راسها و تهدم راسها،مي اي حاجة ممكنة، مين هاد القانون قدرنا نطبقوه علي 2 ولا 3 دالفوتونات دابا يجي نهار لي نطبقوه على الذرات و من تم الجزيئات ...حتا نوصلو لبنادم.